دخيلك لا تبكيني

يضيق الصدر.. لاشفتك.. حبيبي تمسح دموعك
ترى مااقوى على حزنك.. لك الله لاتبكّيني

حبيبي للفرح دايم.. ابيك اتوّقد اشموعك
وابا زورك.. وابفرح به.. لو انه مايدانيني

وش اللي صار باحوالك.. طلبتك قول موضوعك
ألى هالحد تغليني.. وماودك تعنيّني

تعال وشوفها احزانك.. بَنَت في روحي افروعك
هدمت افراح من شانك.. وماتن بي بساتيني

حرام ارتاح في نومي.. إذا ماارتحت بهجوعك
قسم بالله مااخونك.. مدامك حيل تغليني

تراك النور لعيوني ..طلبتك جود بطلوعك
أنا المجنونة والتايه.. وليل الهم معميني

ومدامك مكسف وذابل ..وزايد ياسك وروعك
أنا لامن دخلت الويل ضايع.. من يقدّيني؟!

وليل من الفرح يبكي ..يبيك اتجود برجوعك
وهمّاً ياتلف حالي.. كفر بي.. لاعباً فيني

حبيبي وش تبي قلي.. أنا كلي رهن طوعك
علامك يابعد عمري.. حزين وماتحاكيني

تعال وخذ من اشعاري.. تسّلا عطني اسموعك
وإذا ماجاز لك شعري.. حرام اتخطه ايديني

تبي قلبي ترى جالك.. رحل لك ..داخل اضلوعك
تبي روحي ..تبي فرحي.. تبي مالي.. تبي عيني

حبيبي جيتك ابدمعي.. وودي تمسح ادموعك
أنا غصّتني العبره.. دخيلك لاتبّكيني